जेठ ३२
भुकम्पले ध्वस्त बनाएको चौतारा नगरपालिका–१स्थित सिद्धिकमला देवी माविलाई विभिन्न स्थानबाट सहयोग प्राप्त भएको छ। विद्यालयको भवन पुर्ननिर्माण, विद्यार्थीको क्षमता अभिवृद्धि तथा अक्षयकोष सञ्चालनका लागि दाताहरुले सहयोग गरेका छन्।
विद्यालयलाई सापकोटा समाजसहित विभिन्न व्यक्तिहरुले आर्थिक सहयोग प्रदान गरेका हुन्। कक्षा १० सम्म सञ्चालित विद्यालयलाई १ लाख ९२ हजार १ सय ११ रुपैयाँ सहयोग आएको विद्यालय व्यवस्थापन समितिका सदस्य राजकुमार कुवँरले जानकारी दिए। उनकाअनुसार समाजले १ लाख २५ हजार एक सय ११ र गाउँकै दुई व्यक्तिले सहयोग गरेका हुन्।
गाउँका अगुवा नेता एवं विद्यालय व्यवस्थापन समितिका पूर्व अध्यक्ष सोम सापकोटाले भुकम्पमा परि मृत्यु भएकी आफ्नी नातिनी सबीको सम्झनामा ५१ हजार प्रदान गरेका थिए। त्यस्तै बीरबहादुर सापकोटाले आफ्ना स्वर्गीय बुबा लालबहादुरको सम्झनामा १६ हजार रुपैयाँ विद्यालयलाई सहयोग गरेका थिए।
समाजले प्रदान गरेको रकम जिविस महासंघका पूर्व सभापति कृष्णलाल सापकोटाले सोमबार विद्यालयमा आयोजित एक कार्यक्रममा हस्तान्तरण गरेका थिए। उनले विद्यालयका प्रधानाध्यापक पितम कुवँर र विव्यस अध्यक्ष गणेश सापकोटालाई रकम हस्तान्तरण गरेका हुन्। विद्यालयका प्रधानाध्यापक कुवँरले सहयोग गर्नेहरुप्रति धन्यवाद ज्ञापन गर्दै रकम दुरुपयोग नहुने प्रतिबद्धता जनाए।
बालविकासदेखि कक्षा १० सम्म सञ्चालित यो विद्यालयमा ३ सय ५० विद्यार्थी अध्यापनरत छन्। गएको बैशाख १२ गतेको शक्तिशाली भुकम्प र त्यसपछिका पराकम्पले यो विद्यालयलाई पूर्ण क्षति बनाएको थियो। विद्यालयमा रहेका कुल १४ कोठामध्ये १० वटामा पूर्ण क्षति भएको थियो ।
अोखरेनी साप्ताहिक
अोखरेनी साप्ताहिक
No comments:
Post a Comment