झापाबाट बाँस बोकेर मेलम्ची पुगे विद्यार्थीहरू

असार २ । 

सिन्धुपाल्चोकको मेलम्चीस्थित तेर्से उच्च माध्यमिक विद्यालयको भवन भूकम्पले भत्किएपछि झापाका विद्यार्थीले पठनपाठनका लागि अस्थायी कक्षाकोठा बनाउने भएका छन् ।

 

अस्थायी कक्षाकोठा निर्माणका लागि एमालेनिकट अनेरास्ववियुको टोली एक हजार एक घना बाँस लिएर बिहीबार सिन्धुपाल्चोकतर्फ प्रस्थान गरेका छन् ।

 

अनेरास्ववियुका केन्द्रीय प्रचार विभाग प्रमुख अशेष घिमिरेको नेतृत्वमा सिन्धुपाल्चोक गएको टोलीले विद्यालयका लागि २२ कोठाको अस्थायी भवन निर्माण गर्ने जनाएको छ ।

 

सिन्धुपाल्चोक लैजानका लागि झापाको मेचीनगर, बाहुनडाँगी र शान्तिनगरक्षेत्रबाट स्थानीय विद्यार्थीले बाँस सङ्कलन गरेका थिए । बाँसलाई ट्रकमा हालेर लगिएको छ । विद्यार्थी टोलीले बाँसको घर बनाउन सिपालु चारजना दक्ष कामदारसमेत आफूसँगै लगेको छ । रासस